జుట్టు రాలిపోవడం, చిట్లిపోవడం లాంటి సమస్యలను దూరం చేసే మునగాకు !

ఆయుర్వేదంలో మునగాకు చాలా ప్రాధాన్యం ఉంది. దీనిలో ఎన్నో ఆరోగ్య ప్రయోజనాలున్నాయి. ముఖ్యంగా ఇమ్యూనిటీని పెంచగలిగే గుణాలున్నాయి. ఎన్నో శతాబ్దాలుగా మునగాకుని ఆయుర్వేద మందుల్లో వాడుతున్నారు. శరీరంలో ఉన్న ఇన్ ఫ్లమేషన్ ని తగ్గించి ఇమ్యూనిటీని పెంచడంలో మునగాకు ఎంతో కీలక పాత్ర పోషిస్తుంది. మామూలుగా అయితే ఇది కేవలం రోగనిరోధక శక్తిని పెంచుతుందని అనుకుంటారు. కానీ ఇందులో ఉన్న పోషకాలు జుట్టు ఒత్తుగా పెరిగేందుకు కూడా తోడ్పడుతుంది. ప్రధానంగా స్కాల్ప్ హెల్త్ ని కాపాడుతుంది. జుట్టు రాలిపోవడం, చిట్లిపోవడం లాంటి సమస్యలను దూరం చేస్తుంది. ఈ ఆకులో విటమిన్ ఎ, బి, సి, ఇ ఉంటాయి. వీటితో పాటు ఐరన్, జింక్, అమినో యాసిడ్స్ కూడా పుష్కలంగా ఉంటాయి. కురుల కుదుళ్లను బలంగా ఉంచడంలో ఇవి తోడ్పడతాయి. మునగాకులో విటమిన్ ఎ తో పాటు జింక్ ఉంటుంది. ఈ రెండు స్కాల్ప్ ని ఆరోగ్యంగా ఉంచడంలో సాయపడతాయి. మునగాకుతో తయారు చేసే హెయిర్ మాస్క్ ద్వారా స్కాల్ప్ కి సరైన విధంగా రక్త సరఫరా అందుతుంది. అంతే కాదు. చుండ్రును తగ్గించడంతో పాటు హెయిర్ ఫాలికల్స్ ని బలంగా ఉంచడంలో కీలక పాత్ర పోషిస్తాయి. రెండు టేబుల్ స్పూన్స్ మేర మునగాకు పొడిలో, మూడు టేబుల్ స్పూన్స్ వరకూ యోగర్ట్ కలపాలి. ఈ రెండింటినీ బాగా మిక్స్ చేయాలి. ఆ తరువాత  ఓ టేబుల్ స్పూన్ కొబ్బరి నూనె కలపాలి. అందుబాటులో ఉంటే ఆలివ్ ఆయిల్ వాడడం ఇంకా మంచిది. జుట్టుకు సరైన విధంగా పట్టేలా ఈ మిశ్రమాన్ని అప్లై చేయాలి. కనీసం అరగంట పాటు అలాగే ఉంచాలి. ఆ తరవాత షాంపూతో శుభ్రం చేసుకోవాలి. మునగాకులో పోషకాలతో పాటు యాంటీ మైక్రోబయల్, యాంటీ ఫంగల్ గుణాలు కూడా అధికంగా ఉంటాయి. ఇవి స్కాల్ప్ పైన వచ్చే ఇన్ఫెక్షన్స్ ని తగ్గిస్తాయి. ఇదే సమయంలో స్కాల్ప్ ని చాలా శుభ్రంగా ఉంచుతాయి. ఫాలికల్స్ కి సరైన విధంగా పోషకాలను అందిస్తాయి. మరో రకంగా కూడా మునగను జుట్టు పెంచేందుకు వాడవచ్చు. ఎలాగంటే..మునగ నూనె కూడా అందుబాటులో ఉంటుంది. గింజల నుంచి ఈ నూనె తయారు చేస్తారు. ఈ నూనెలో ఒమెగా 9 ఫ్యాటీ యాసిడ్స్ అధికంగా ఉంటాయి. అంతే కాదు. ఇందులో బెహెనిక్ యాసిడ్ కూడా ఉంటుంది. వీటిని జుట్టు చాలా త్వరగా గ్రహిస్తుంది. ముందుగా ఓ టేబుల్ స్పూన్ లేదా రెండు టేబుల్ స్పూన్స్ మేర మునగ నూనె తీసుకోవాలి. కాస్తంత వేడి చేయాలి. ఇది గోరు వెచ్చగా ఉంటే సరిపోతుంది. ఈ ఆయిల్ ని స్కాల్ప్ కి బాగా పట్టించాలి. రాత్రంతా అలాగే ఉంచినా పరవాలేదు. లేదంటే రెండు గంటల పాటు ఉంచి ఆ తరవాత శుభ్రం చేసుకుంటే సరిపోతుంది. ఈ నూనె అప్లై చేసినప్పుడు కేవలం రాయడం అని కాకుండా సరైన విధంగా మసాజ్ చేయాలి. దీని వల్ల వెంట్రుకలకు రక్త సరఫరా మెరుగ్గా అవుతుంది. పైగా ఇందులో తేమ గుణం ఎక్కువగా ఉంటుంది. బాగా పొడిగా ఉండే వెంట్రుకలకు ఇది తేమ అందిస్తుంది. ఫలితంగా వెంట్రుకలు చిట్లిపోవడం, రాలిపోవడం లాంటి సమస్యలు రాకుండా ఉంటాయి. అయితే టీ రూపంలో కూడా మునగాకును తీసుకోవచ్చని చెబుతున్నారు ఎక్స్ పర్ట్స్. ఎన్నో విటమిన్స్ ఉన్న ఈ ఆకుల వల్ల జుట్టు ఒత్తుగా పెరగడంతో పాటు మెరుపు వస్తుంది. ముఖ్యంగా హెయిర్ ఫాల్ తగ్గించడంలో ఇది సాయపడుతుంది. ఎలా వాడాలంటే..ముందుగా కొన్ని నీళ్లలో మునగాకులు వేసి బాగా మరిగించాలి. లేదా మునగాకు పొడిని వేసి మరిగించినా సరిపోతుంది. ఇలా మరిగిన నీటిని కాసేపటి వరకూ పక్కన పెట్టాలి. చల్లారే వరకూ అలాగే ఉంచాలి. సాధారణంగా మీరు రోజూ వాడే షాంపూ తలకు అప్లై చేసిన తరవాత మునగాకు నీటిని తలపై పోసుకోవాలి. కాసేపటి వరకూ అలాగే ఉంచాలి. మునగాకుతో తయారు చేసిన షాంపూ జుట్టుకు టానిక్ లా పని చేస్తుంది. కుదుళ్ల నుంచి సరైన విధంగా జుట్టు పెరిగేలా చూస్తుంది. అన్ని రకాల పోషకాలను అందిస్తుంది. ముఖ్యంగా జుట్టు రాలిపోవడం, చివర్లు చిట్లిపోవడం లాంటి సమస్యలకు ఇది పరిష్కారం చూపిస్తుంది.