దొండకాయలో ఫైబర్, విటమిన్ బి1, బి2, బి3, బి6, బి9, విటమిన్ సి, కాల్షియం, మెగ్నీషియం, ఐరన్, ఫాస్ఫరస్, పొటాషియం, సోడియం, జింక్ వంటి పోషకాలు పుష్కలంగా లభిస్తాయి. కొంతమంది కొన్ని ప్రత్యేక కారణాల వల్ల దొండకాయను ఆహారంలో చేర్చుకోకూడదు. దొండకాయ రక్తపోటును తగ్గించే గుణాలను కలిగి ఉంటుంది. ఇది అధిక రక్తపోటు ఉన్నవారికి ప్రయోజనకరంగా ఉంటుంది. కానీ, తక్కువ రక్తపోటుతో బాధపడుతున్నవారు ఎక్కువగా దొండకాయ తింటే వారి రక్తపోటు మరింత తగ్గే ప్రమాదం ఉంది. దీనివల్ల నీరసం, మూర్ఛ, తలనొప్పి, అలసట వంటి సమస్యలు కలగవచ్చు. కాబట్టి, తక్కువ బీపీ ఉన్నవారు దొండకాయను మితంగా తీసుకోవడం లేదా పూర్తిగా మానేయడం మంచిది. చర్మ సంబంధిత లేదా శ్వాసకోశ సంబంధిత అలెర్జీలు వున్న వారు దొండకాయ తింటే ప్రతిచర్యలు వచ్చే అవకాశం ఉంది. దొండకాయ తినడం వల్ల వికారం, వాంతులు, చర్మంపై దురద, మంట, వాపు వంటి లక్షణాలు కనిపించవచ్చు. కొందరికి శ్వాస తీసుకోవడంలో కూడా ఇబ్బంది కలుగుతుంది. ఎవరైనా శస్త్రచికిత్స చేయించుకోబోతున్నట్లయితే, ఆ సమయంలో లేదా ఆపరేషన్కు కొన్ని రోజుల ముందు దొండకాయ తినకూడదు. దొండకాయ రక్తంలోని చక్కెర స్థాయిని తగ్గించే అవకాశం ఉంది. ఇది శస్త్రచికిత్స సమయంలో సమస్యలు సృష్టించవచ్చు. గర్భధారణ సమయంలో దొండకాయలు తినడం గురించి నిపుణులు భిన్నాభిప్రాయాలు వ్యక్తం చేస్తున్నారు. అయితే, వీరు పరిమిత పరిమాణంలో తింటే కొన్ని ప్రయోజనాలు ఉండవచ్చు. కానీ ఎక్కువగా తింటే మాత్రం సమస్యలు వచ్చే అవకాశం ఉంది. పాలిచ్చే తల్లులు కూడా దొండకాయను ఎక్కువగా తీసుకోకూడదు. ఇది పిల్లలకు జీర్ణ సంబంధిత సమస్యలను కలిగించవచ్చు. కాబట్టి, ఈ సమయంలో దొండకాయ తినే విషయంలో జాగ్రత్త వహించడం ముఖ్యం. డయాబెటిస్ ఉన్నవారు రక్తంలో చక్కెర స్థాయిలు ఎక్కువగా ఉంటే దొండకాయను తినవచ్చు. కానీ, ఒకవేళ రక్తంలో చక్కెర స్థాయిలు తక్కువగా ఉంటే దొండకాయ తినడం మంచిది కాదు. దొండకాయ రక్తంలోని చక్కెర స్థాయిలను మరింత తగ్గిస్తుంది. దీనివల్ల నీరసం, కళ్లు తిరగడం వంటి సమస్యలు వచ్చే అవకాశం ఉంది. కాబట్టి, తక్కువ షుగర్ ఉన్నవారు దొండకాయను తినే ముందు వైద్యుడిని సంప్రదించడం మంచిది.
