హర్యానాలోని పానిపట్, జాతల్ రోడ్లోని ఒక ప్రైవేట్ పాఠశాలలో హోంవర్క్ చేయలేదని రెండవ తరగతి విద్యార్థిని కిటికీకి తలక్రిందులుగా వేలాడదీసి దారుణంగా కొట్టిన వీడియో సోషల్ మీడియాలో వైరల్ అయింది. వైరల్ అయిన వీడియో తర్వాత పోలీసులు పాఠశాల డ్రైవర్ అజయ్, ప్రిన్సిపాల్ రీనాను అరెస్టు చేశారు. విద్యార్థి తల్లి డాలీ మాట్లాడుతూ, ఏడేళ్ల తన కుమారుడు హోం వర్క్ పూర్తి చేయలేదని చెప్పింది. దీంతో పాఠశాల ప్రిన్సిపాల్ డ్రైవర్ అజయ్కు ఫోన్ చేసి, ఆ పిల్లవాడిని శిక్షించమని కోరింది. అజయ్ ఆ పిల్లవాడిని మేడ మీద ఉన్న గదికి తీసుకెళ్లి, తాడుతో కట్టి, కిటికీకి తలక్రిందులుగా వేలాడదీసి, చెంపదెబ్బ కొట్టాడు. అంతేకాకుండా, అతను ఒక వీడియో తీసి సోషల్ మీడియాలో అప్లోడ్ చేశాడు. వీడియో కాల్ ద్వారా తన స్నేహితులకు చూపించాడు. మరో వీడియోలో, ప్రిన్సిపాల్ రీనా ఇతర విద్యార్థుల ముందు చిన్న పిల్లలను చెంపదెబ్బ కొట్టడం కనిపించింది. ఆ పిల్లలు ఇద్దరు దురుసుగా ప్రవర్తించారని, కుటుంబ సభ్యుల అనుమతితోనే ఆమె వారిని మందలించిందని ప్రిన్సిపాల్ వివరించారు. బాధిత కుటుంబం మోడల్ టౌన్ పోలీస్ స్టేషన్లో ఫిర్యాదు చేసింది. నిందితుడైన డ్రైవర్, ప్రిన్సిపాల్ను ఐపీసీలోని వివిధ సెక్షన్లు, జువెనైల్ జస్టిస్ చట్టం కింద అరెస్టు చేసినట్లు డీఎస్పీ సతీష్ వాట్స్ తెలిపారు. దర్యాప్తు ప్రారంభించి నిందితులపై చర్యలు తీసుకుంటామని పోలీసులు తెలిపారు.
