గుజరాత్లోని అహ్మదాబాద్లో రోడ్డు భద్రతా ప్రచారం పేరిట ట్రాఫిక్ పోలీసులు ఏర్పాటు చేసిన కొన్ని పోస్టర్లు ప్రస్తుతం దేశవ్యాప్తంగా తీవ్ర చర్చనీయాంశంగా మారాయి. ఈ పోస్టర్లపై "రాత్రి ఆలస్యంగా పార్టీలకు వెళ్లవద్దు, మీరు అత్యాచారం లేదా సామూహిక అత్యాచారానికి గురికావచ్చు" .. "మీ స్నేహితురాలితో చీకటి, నిర్మానుష్య ప్రాంతాలకు వెళ్లవద్దు, ఆమె అత్యాచారం లేదా సామూహిక అత్యాచారానికి గురైతే?" వంటి సంచలనాత్మక వ్యాఖ్యలు ఉండటం తీవ్ర దుమారానికి కారణమైంది. ఈ వ్యాఖ్యలు మహిళలు తమ భద్రత కోసం ఇంటి వద్దనే ఉండాలని సూచించినట్లుగా అర్థం వచ్చేలా ఉండటంతో, ప్రజల నుంచి ముఖ్యంగా మహిళా సంఘాల నుంచి తీవ్ర విమర్శలు వెల్లువెత్తాయి. అహ్మదాబాద్లోని సోలా, చాండ్లోడియా ప్రాంతాలలో రోడ్డు డివైడర్లపై అతికించిన ఈ పోస్టర్లు క్షణాల్లో సామాజిక మాధ్యమాల్లో వైరల్గా మారాయి. ఈ సంఘటన గుజరాత్లో మహిళల భద్రతపై తీవ్ర ఆందోళనలను రేకెత్తించింది. రాష్ట్రంలో మహిళల రక్షణ ఎంత ప్రశ్నార్థకంగా మారిందో ఈ పోస్టర్లు నిరూపిస్తున్నాయని ప్రతిపక్షాలు గుజరాత్ బీజేపీ సర్కారుపై నిప్పులు చెరిగాయి. ఈ పోస్టర్లను వ్యతిరేకించిన వారిలో వివిధ రాజకీయ పార్టీలు, పౌర హక్కుల కార్యకర్తలు, మహిళా సంఘాలు ఉన్నాయి. ఈ పోస్టర్లు మహిళల స్వేచ్ఛను హరించేలా ఉన్నాయని, బాధితులనే నిందించే విధంగా ఉన్నాయని తీవ్ర స్థాయిలో మండిపడ్డారు. వివాదం తీవ్రం కావడంతో, ఆ పోస్టర్లను వెంటనే తొలగించారు. ఈ వివాదంపై డిప్యూటీ కమిషనర్ ఆఫ్ పోలీస్ (ట్రాఫిక్ వెస్ట్) నీతా దేశాయ్ స్పందించారు. నగర ట్రాఫిక్ పోలీసులు కేవలం రోడ్డు భద్రతకు సంబంధించిన పోస్టర్లను మాత్రమే స్పాన్సర్ చేశారని, మహిళల భద్రతకు సంబంధించిన అటువంటి వివాదాస్పద పోస్టర్లను కాదని ఆమె స్పష్టం చేశారు. "సతర్క్ తా గ్రూప్" అనే ఒక స్వచ్ఛంద సంస్థ ట్రాఫిక్ పోలీసుల అనుమతి లేకుండానే ఈ వివాదాస్పద పోస్టర్లను సృష్టించి అతికించిందని ఆమె ఆరోపించారు."ఆ ఎన్జీవో మమ్మల్ని సంప్రదించి, పాఠశాలలు, కళాశాలలలో ట్రాఫిక్ అవగాహన కార్యక్రమాలను నిర్వహించాలనుకుంటున్నామని, తమతో పాటు మా సిబ్బంది రావాలని కోరారు. ట్రాఫిక్ అవగాహనకు సంబంధించిన పోస్టర్లను మాత్రమే మాకు చూపించారు. అయితే, అటువంటి వివాదాస్పద పోస్టర్లను మాకు చూపించలేదు. మా అనుమతి లేకుండానే వాటిని అతికించారు" అని డీసీపీ నీతా దేశాయ్ వివరించారు. ఈ విషయం తమ దృష్టికి రాగానే వెంటనే ఆ పోస్టర్లను తొలగించామని ఆమె తెలిపారు. గుజరాత్ ఆమ్ ఆద్మీ పార్టీ (ఆప్) ఈ పోస్టర్ల వివాదంపై తీవ్రంగా స్పందించింది. బీజేపీ నేతృత్వంలోని ప్రభుత్వంపై విమర్శలు ఎక్కుపెట్టి, ఈ పోస్టర్లు మహిళల భద్రత వాస్తవ పరిస్థితిని బయటపెట్టాయని పేర్కొంది. "గుజరాత్లో బీజేపీ ప్రభుత్వం మహిళా సాధికారత గురించి గొప్పగా మాట్లాడుతుంది, కానీ వాస్తవ పరిస్థితి పూర్తిగా భిన్నంగా ఉంది. గత మూడేళ్లలో గుజరాత్లో 6,500 కంటే ఎక్కువ అత్యాచార సంఘటనలు, 36 కంటే ఎక్కువ సామూహిక అత్యాచారాలు జరిగాయి, అంటే రోజుకు ఐదు కంటే ఎక్కువ అత్యాచారాలు" అని ఆప్ ఒక ప్రకటనలో గణాంకాలతో సహా వెల్లడించింది. ఈ వివాదం గుజరాత్లో మహిళా భద్రతపై తీవ్ర రాజకీయ దుమారానికి దారితీసింది.
