పత్తి దిగుమతులపై విధించే 11 శాతం సుంకాన్ని తాత్కాలికంగా రద్దు చేస్తూ గతంలో తీసుకున్న నిర్ణయాన్ని మరో మూడు నెలల పాటు పొడిగిస్తూ కేంద్ర ప్రభుత్వం గురువారం ప్రకటించింది. ఈ నిర్ణయం ముఖ్యంగా అమెరికా విధించిన అధిక సుంకాల నేపథ్యంలో, భారతీయ టెక్స్టైల్ ఎగుమతిదారులకు పెద్ద ఊతమిస్తుంది. గతంలో, ఆర్థిక మంత్రిత్వ శాఖ ఆగస్టు 19 నుంచి సెప్టెంబర్ 30 వరకు పత్తి దిగుమతులపై సుంకం మినహాయింపు ఇచ్చింది. ఇప్పుడు దానిని మరిన్ని నెలల పాటు కొనసాగించాలని నిర్ణయించింది. ఈ నిర్ణయానికి ప్రధాన కారణం అమెరికా ప్రభుత్వం ఇటీవల భారతీయ ఉత్పత్తులపై విధించిన అధిక సుంకం. ఆగస్టు 27 నుంచి అమెరికా, భారత్ నుంచి దిగుమతి చేసుకునే టెక్స్టైల్స్, ఆభరణాలు, తోలు ఉత్పత్తులపై 50 శాతం వరకు సుంకాన్ని విధించింది. దీనివల్ల భారతీయ ఎగుమతిదారులు తీవ్ర ఒత్తిడిని ఎదుర్కొంటున్నారు. ఈ పరిస్థితుల్లో వారికి మద్దతుగా, ప్రభుత్వం ఈ దిగుమతి సుంకం మినహాయింపును పొడిగించింది. ప్రభుత్వం పత్తి (HS 5201) దిగుమతులపై ఉన్న అన్ని సుంకాలను రద్దు చేసింది. దీనిలో 5 శాతం బేసిక్ కస్టమ్స్ డ్యూటీ, 5 శాతం అగ్రికల్చర్ ఇన్ఫ్రాస్ట్రక్చర్ అండ్ డెవలప్మెంట్ సెస్ ఈ రెండింటిపై విధించే 10 శాతం సోషల్ వెల్ఫేర్ సర్ఛార్జ్ ఉన్నాయి. వీటితో కలిపి మొత్తం 11శాతం సుంకాన్ని ప్రభుత్వం రద్దు చేయడంతో అనేక ప్రయోజనాలు లభించనున్నాయి. పత్తిపై సుంకం మినహాయింపు వల్ల నూలు, వస్త్రాలు, దుస్తులు వంటి వాటి తయారీ ఖర్చులు తగ్గుతాయి. ఇది తయారీదారులకు, వినియోగదారులకు లాభం చేకూరుస్తుంది. దేశీయ మార్కెట్లో పత్తి లభ్యత పెరుగుతుంది, దీనివల్ల ధరలు స్థిరీకరణ చెందుతాయి. ఇది వస్త్ర ఉత్పత్తుల ధరలపై ద్రవ్యోల్బణం ఒత్తిడిని తగ్గిస్తుంది. ఉత్పత్తి ఖర్చులు తగ్గడం వల్ల భారతీయ టెక్స్టైల్ ఉత్పత్తులు అంతర్జాతీయ మార్కెట్లో మరింత పోటీపడగలుగుతాయి. ఈ నిర్ణయం టెక్స్టైల్ రంగంలో ఉన్న చిన్న, మధ్య తరహా పరిశ్రమలకు కూడా ఆర్థికంగా మద్దతు ఇస్తుంది. ఈ చర్యల ద్వారా ప్రభుత్వం భారతీయ టెక్స్టైల్ పరిశ్రమను రక్షించడంతో పాటు, అమెరికా విధించిన సుంకాల ప్రభావాన్ని తగ్గించడానికి ప్రయత్నిస్తోంది.
