హర్యానాలోని రోహ్తక్ జిల్లా, అజైబ్ గ్రామంలో బంగారు లాకెట్ కోసం భర్తతో జరిగిన చిన్న వివాదం, చివరకు రెండు నెలల శిశువు ప్రాణాలను తీసింది. నిందితురాలైన ప్రియాంక అనే తల్లి తన కొడుకు జైవిక్ను నీటి డ్రమ్లో ముంచి హత్య చేసిన సంఘటన ప్రస్తుతం గ్రామమంతా కలకలం రేపుతోంది. పోలీసుల కథనం ప్రకారం, 25 ఏళ్ల ప్రియాంక తన భర్త మోహిత్ను కుమారుడికి బంగారు లాకెట్ తయారుచేయించమని 12 రోజుల క్రితం కోరిందని తెలిపింది. అయితే మోహిత్ ఆర్థికంగా వీలుకాదని చెప్పడంతో, ఆగ్రహంతో ఉన్న ప్రియాంక తన కుమారుడిని హత్య చేయాలనే పథకాన్ని రచించింది. ప్రియాంక మొదట శిశువును ప్రేమగా ముద్దుపెట్టి, అనంతరం నీటితో నిండిన డ్రమ్లో అతన్ని ముంచి చంపిందని పోలీసులు తెలిపారు. అనంతరం తాను అపస్మారక స్థితిలోకి వెళ్లినట్టు నటించి, ఒక ముసుగు ధరించిన మహిళ ఇంటిలోకి ప్రవేశించి తన బిడ్డను అపహరించిందని చెప్పారు. తాను ఆమెను ఆపే ప్రయత్నం చేయగా, ఆమె తనను నెట్టివేసిందని దాంతో మూర్ఛిపోయానని ప్రియాంక కథను మేల్కొన్న తరువాత చెప్పింది. దర్యాప్తు అధికారులు మొదట నుంచే ఈ కథపై అనుమానం వ్యక్తం చేశారు. సంఘటనా ప్రాంతానికి సమీపంలో ఉన్న సీసీటీవీ ఫుటేజ్లో ఎలాంటి అనుమానాస్పద చలనం కనిపించలేదు. అంతేకాకుండా, ప్రియాంక చెంత ఉన్న గాజులు చెదలకుండా ఉండటంతో పాటు, ఆమె శరీరంపై ఎలాంటి గాయాలు లేవన్నది పోలీసులకు మరింత సందేహాలకు దారి తీశాయి. 72 గంటల్లో 20 మందిని విచారించిన తరువాత, ఎలాంటి ముసుగు ధరించిన మహిళ తమకు కనిపించలేదని గ్రామస్తులు స్పష్టం చేశారు. ఈ నేపథ్యంలో కఠినంగా విచారించిన పోలీసులు చివరకు ప్రియాంక నుంచే నిజాన్ని బయటకు తీసారు. నిందితురాలు ప్రియాంకను పోలీసులు అరెస్టు చేసి, శుక్రవారం కోర్టులో హాజరుపరచనున్నారు. ఇది పూర్తిగా ప్రణాళికా పూర్వకంగా చేసిన హత్య అని పోలీసులు స్పష్టం చేశారు. గ్రామస్థులు ఈ సంఘటనతో దిగ్బ్రాంతికి గురవుతున్నారు.
