చైనాలోని శాస్త్రవేత్తలు గబ్బిలాల్లో 22 కొత్త వైరస్‌లను గుర్తించారు. వీటిలో కొన్ని కరోనా కంటే ప్రమాదకరమైనవిగా గుర్తించబడ్డాయని, ప్రాణాంతక ఫలితాలను కలిగించే అవకాశముందని నిపుణులు హెచ్చరిస్తున్నారు. సుమారు 142 గబ్బిలాల మూత్రపిండాలపై జరిపిన పరిశోధనలో 22 రకాల వైరస్‌లు ఉన్నట్లు గుర్తించారు. వీటిలో కొన్ని ఇప్పటికే ప్రపంచానికి తెలిసిన హెనిపా, నిపా వైరస్‌లు కూడా ఉన్నాయి. గబ్బిలాల నుంచి వైరస్‌లు మూత్రం ద్వారా లేదా తినే పండ్లు, కూరగాయల ద్వారా మనుషులకు వ్యాపించే ప్రమాదం ఉన్నట్లు నివేదికలో పేర్కొన్నారు. ఈ కొత్తగా గుర్తించిన వైరస్‌లలో చాలా వరకు మానవ శరీరంలోకి ప్రవేశించిన తర్వాత ఆకస్మికంగా వ్యాధుల రూపంలో మారుతాయి.ముఖ్యంగా నిపా వంటి వైరస్‌లు ఒకసారి శరీరంలోకి ప్రవేశించిన తర్వాత మెదడు ఫంక్షన్‌కు తీవ్రమైన నష్టం కలిగించడమే కాదు, శ్వాస తీసుకోవడాన్ని కూడా ప్రభావితం చేస్తాయి. ఇది కొద్ది గంటల్లోనే మృతికి దారితీసే ప్రమాదం ఉంది. ఈ వైరస్‌లు గబ్బిలాల ద్వారా కొన్ని మార్గాల్లో మానవులకు సోకుతాయి: గబ్బిలాల మూత్రంతో కాలుష్యానికి లోనైన పండ్లు, కూరగాయలు తినడం, గబ్బిలాల నేరుగా మానవులతో సంబంధం పెట్టుకోవడం, వైరస్ సోకిన ఇతర జంతువుల ద్వారా మానవులకు చేరడం. కరోనా అనంతరం ప్రపంచం మరింత అప్రమత్తంగా ఉండాల్సిన అవసరం ఉన్నప్పటికీ, తాజా గబ్బిలాల వైరస్‌ల విషయం గ్లోబల్ పబ్లిక్ హెల్త్‌కు మరొక హెచ్చరికగా మారింది. ఈ వైరస్‌లు అంతర్జాతీయంగా వ్యాపిస్తే, మరో మహమ్మారి ఏర్పడే ప్రమాదం ఉంది.
