అభిశంసనకు గురైన దక్షిణ కొరియా అధ్యక్షుడు యూన్ పై నేరారోపణ కోసం ఈ కేసును ప్రాసిక్యూటర్ల కార్యాలయానికి బదిలీ చేస్తున్నట్లు దక్షిణ కొరియా అవినీతి నిరోధక సంస్థ (సిఐఒ) గురువారం తెలిపింది. యూన్ పై అధికార దుర్వినియోగంతో పాటు ఇతరుల హక్కులను వినియోగించుకోకుండా అడ్డుకోవడం, తిరుగుబాటు అభియోగాలు మోపవలసిందిగా ప్రాసిక్యూటర్లను అభ్యర్థించనున్నట్లు సిఐఒకి చెందిన ఉన్నతాధికారులు ఓ ప్రకటనలో తెలిపారు. అధ్యక్షుడు, వారి కుటుంబ సభ్యులతో సహా ఉన్నత స్థాయి అధికారులపై విచారణ చేపట్టడానికి 2021లో సిఐఒ ప్రారంభమైంది. ఈ అధికారులతో పాటు పోలీసులు, రక్షణమంత్రిత్వ శాఖతో కూడిన ఉమ్మడి బృందం విచారణ చేపడుతుంది. అయితే పరిమిత హక్కులు కలిగి ఉండటంతో సిఐఒ అధ్యక్షుడిని దర్యాప్తు చేసే అధికారం లేదు. దీంతో తదుపరి చర్య కోసం కేసును ప్రాసిక్యూటర్ల కార్యాలయానికి సమర్పించాల్సి ఉంటుంది.
