ఢిల్లీ పూసాలోని భారత వ్యవసాయ పరిశోధన సంస్థ నుంచి ప్రధాన మంత్రి ధన్ ధాన్య కృషి యోజన పథకాన్ని రూ.24 వేల కోట్లతో ప్రధాని నరేంద్ర మోడీ ప్రారంభించారు. ప్రతి పొలానికి నీటిపారుదల సౌకర్యాలను అందించడం, పంట ఉత్పాదకతను పెంచడం, రైతులకు సులభమైన రుణ సౌకర్యాలను అందించడం, స్థిరమైన వ్యవసాయ పద్ధతులను అవలంబించేలా రైతులను ప్రోత్సహించడం ప్రధానమంత్రి ధన్ ధాన్య కృషి యోజన పథకం ప్రధాన లక్ష్యం. ఈ పథకం కింద వంద ఆకాంక్ష జిల్లాల జాబితాను అభివృద్ధి చేశారు. దిగుబడి పరంగా దేశ వ్యాప్తంగా ఈ జిల్లాలు వెనుకబడి ఉన్నాయి. ఇక్కడ రైతుల ఆదాయం, పంట ఉత్పాదకత ఇతర జిల్లాల కంటే గణనీయంగా తక్కువగా ఉన్నాయి. ప్రధానమంత్రి ధన్ ధాన్య కృషి యోజన కింద, కేంద్ర ప్రభుత్వం ఈ జిల్లాలను 2030 నాటికి జాతీయ సగటుకు పెంచాలని లక్ష్యంగా పెట్టుకుంది. ఈ పథకంలో భాగం అయిన100 జిల్లాలు 11 మంత్రిత్వ శాఖల నుంచి 36కి పైగా పథకాల నుంచి కూడా ప్రయోజనం పొందనున్నాయి. ధన్ ధాన్య కృషి యోజన ద్వారా 17 మిలియన్ల మంది రైతులు ప్రయోజనం పొందుతారని అంచనా. ప్రధానమంత్రి మోడీ పప్పుధాన్యాల స్వావలంబన మిషన్ను కూడా శనివారం ప్రారంభించారు. “పప్పుధాన్యాల స్వావలంబన మిషన్ కేవలం పప్పుధాన్యాల ఉత్పత్తిని పెంచే లక్ష్యం మాత్రమే కాదు, మన భవిష్యత్ తరాలకు సాధికారత కల్పించే ప్రచారం కూడా” అని ప్రధాని అన్నారు. గత 11 ఏళ్లుగా, ప్రభుత్వం రైతులను శక్తివంతం చేయడానికి, వ్యవసాయంలో పెట్టుబడులను పెంచడానికి నిరంతరం కృషి చేస్తోంది. మెరుగైన విత్తనాలు, నిల్వ సౌకర్యాలు, వారి ఉత్పత్తులను కొనుగోలు చేయడం ద్వారా రైతులు నేరుగా ప్రయోజనం పొందుతారు” అని ప్రధాని చెప్పారు. రైతుల కోసం ఒకేసారి రెండు పథకాలను ప్రారంభించినట్లు ప్రధాని పేర్కొన్నారు. ఈ రెండు పథకాలు భారతదేశ రైతుల అదృష్టాన్ని మారుస్తాయని ఆయన చెప్పారు. ఈ రెండు పథకాలపై ప్రభుత్వం రూ.35 వేల కోట్ల పైగా ఖర్చు చేస్తుందని ప్రధాని చెప్పారు.
