విజయవాడ లోని ఇంద్రకీలాద్రిఫై కొలువై వున్న దుర్గాదేవి నవరాత్రి తొమ్మిదో రోజు రాజరాజేశ్వరీ అలంకారంలో భక్తులకు దర్శనమిచ్చారు. ఆలయ ప్రాంగణం భక్తుల రద్దీతో కిక్కిరిసిపోయింది. దుర్గమ్మను రాజరాజేశ్వరిదేవిగా దర్శించుకోవడానికి రాష్ట్రం నలుమూలల నుండి మాత్రమే కాకుండా, పొరుగు రాష్ట్రాల నుండి కూడా భక్తులు పోటెత్తారు. భవానీ దీక్ష తీసుకున్న భక్తులు విశేషంగా దర్శనానికి తరలివచ్చారు. తెల్లవారుజాము నుంచే దర్శన క్యూలైన్లు భారీగా పెరిగిపోయాయి. కొండపైకి వెళ్లే మార్గాలు మొత్తం భక్తులతో నిండిపోయాయి. భక్తుల రద్దీని దృష్టిలో పెట్టుకుని ఆలయ అధికారులు, పోలీసు శాఖ, ట్రాఫిక్ సిబ్బంది ప్రత్యేక ఏర్పాట్లు చేశారు. కొండపైకి వెళ్లే మార్గాల్లో అదనపు బస్సులను నడిపించారు. నీరు, వైద్య సదుపాయాలు, శీతల గుడారాలు, విశ్రాంతి ప్రాంతాలను ఏర్పాటు చేశారు. ఏ భక్తుడికీ ఇబ్బంది కలగకుండా ప్రతి విభాగం అప్రమత్తంగా పనిచేసింది. దుర్గమ్మను ఈరోజు రాజరాజేశ్వరి అలంకారంలో శోభాయమానంగా తీర్చిదిద్దారు. సింహాసనంపై కూర్చున్న అమ్మవారు రాజమాతలా దర్శనమిచ్చారు. రత్నాలతో అలంకరించిన కిరీటం, కంచుకి వన్నె తెచ్చే పట్టు వస్త్రాలు, బంగారు ఆభరణాలు భక్తులను మంత్రముగ్ధులను చేశాయి. పుష్పాలతో, దీపాలతో సజ్జమైన గర్భగుడిలో అమ్మవారి మహిమాన్వితమైన రూపం చూసిన భక్తులు ఆధ్యాత్మిక ఆనందంలో మునిగిపోయారు.
