రోడ్డు భద్రతను, ట్రాఫిక్ నిబంధనల అమలును బలోపేతం చేసే లక్ష్యంతో కొత్త మార్పులను కేంద్రం తీసుకొచ్చింది. ఈ సవరణల ప్రకారం, ట్రాఫిక్ ఉల్లంఘనలను తేలికగా తీసుకుంటే డ్రైవింగ్ లైసెన్స్ రద్దు కావడం, వాహనం సీజ్ కావడం వంటి కఠిన చర్యలు ఎదుర్కోవాల్సి ఉంటుంది. ఈ ప్రతిపాదిత నిబంధనలపై ప్రజలు, వాటాదారులు తమ అభ్యంతరాలు, సూచనలను రవాణా శాఖ అదనపు కార్యదర్శికి తెలియజేయవచ్చని కేంద్రం స్పష్టం చేసింది. కొత్త ప్రతిపాదనల్లో అత్యంత కీలకమైన అంశం చలాన్ల చెల్లింపు గడువును గణనీయంగా తగ్గించడం. ప్రస్తుతం చలాన పడిన 90 రోజుల్లోగా చెల్లించే అవకాశం ఉండగా, సవరించిన నిబంధనల ప్రకారం ఆ గడువును కేవలం 45 రోజులకు కుదించారు. ఈ 45 రోజుల్లోగా చలాన చెల్లించడంలో విఫలమైతే, సదరు వాహనాన్ని సీజ్ చేసేందుకు అవకాశం ఉంటుంది. ఈ నిబంధన వాహనదారుల్లో చలాన్లను నిర్లక్ష్యం చేసే ధోరణికి అడ్డుకట్ట వేయనుంది. అలాగే, నిబంధనలు అతిక్రమించిన వాహనదారులకు 3 రోజుల్లోగా ఎలక్ట్రానిక్ రూపంలో నోటీసులు జారీ చేయాలని కూడా ఈ సవరణలు సూచిస్తున్నాయి. కేంద్రం ప్రతిపాదించిన ఈ సవరణల వలన ట్రాఫిక్ ఉల్లంఘనలు పునరావృతమైతే తీవ్ర పరిణామాలు తప్పవు. ఒక వాహనంపై ఐదు లేదా అంతకంటే ఎక్కువ చలాన్లు నమోదైతే, సంబంధిత డ్రైవింగ్ లైసెన్స్ను రద్దు చేసే అధికారం అధికారులకు లభించనుంది. అంతేకాకుండా, చలాన్లను ఆలస్యం చేసే వాహనాలపై రవాణా శాఖకు సంబంధించిన ఎలాంటి లావాదేవీలు జరగకుండా నిబంధన పెట్టనున్నారు. దీని అర్థం, పెండింగ్ చలాన్లు ఉన్న వాహనాన్ని విక్రయించడం, దానిపై అడ్రస్ లేదా పేరు మార్పు చేయడం లేదా రిజిస్ట్రేషన్ రెన్యువల్ వంటివి సాధ్యం కావు. ఈ కఠిన నిబంధనలు వాహనదారులు ట్రాఫిక్ రూల్స్ను మరింత బాధ్యతగా పాటించేలా చేయనున్నాయి. కేంద్ర రవాణా మంత్రిత్వ శాఖ ఈ ప్రతిపాదిత సవరణలపై ప్రజల అభిప్రాయాలు, సూచనలు, అభ్యంతరాలను ఆహ్వానించింది. నూతన నిబంధనలపై ఏవైనా సందేహాలు లేదా మార్పులు సూచించదలుచుకున్న వారు రవాణాశాఖ అదనపు కార్యదర్శికి తమ అభిప్రాయాలను పంపవచ్చు. రోడ్డు భద్రతను పెంచడం, చట్టాలను పకడ్బందీగా అమలు చేయడమే లక్ష్యంగా ఈ సవరణలు ఉన్నప్పటికీ, ప్రజల నుంచి వచ్చిన సూచనల మేరకు తుది నిబంధనల్లో మార్పులు చోటు చేసుకునే అవకాశం ఉంది.
