అమెరికా అధ్యక్షుడు డోనాల్డ్ ట్రంప్ సన్నిహితుడు, కన్జర్వేటివ్ నేత ఛార్లీ కిర్క్ను .. ఉటా వాలీ యూనివర్సిటీలో ఓ షూటర్ హత్య చేసిన విషయం తెలిసిందే. వర్సిటీలో ఉన్న ఓ బిల్డింగ్ మీద నుంచి అతను తన వద్ద ఉన్న గన్తో ఛార్లీని కాల్చాడు. మెడలో బుల్లెట్ దిగడంతో.. ఛార్లీ ప్రాణాలు కోల్పోయాడు. అయితే గుర్తు తెలియని షూటర్ ఓ బిల్డింగ్ నుంచి పారిపోతున్న దృశ్యాలను ఎఫ్బీఐ రిలీజ్ చేసింది. గన్తో షూట్ చేసిన తర్వాత బిల్డింగ్ మీద నుంచి కిందకు దూకి. వర్సిటీ లాన్ నుంచి అతను బయటకు వెళ్లిపోయాడు. షూటర్కు చెందిన ఆనవాళ్లను ఫోరెన్సిక్ పోలీసులు సేకరించారు. రూఫ్టాఫ్ మీద షూటర్ కాలి ముద్రలు, చేతి ముద్రలు తీసుకున్నారు. షూటర్ వాడిన ఆయుధాన్ని కూడా వర్సిటీ సమీపంలో ఉన్న అడవుల నుంచి సేకరించారు. ఛార్లీని చంపిన అనుమానిత వ్యక్తి సన్గ్లాసెస్ పెట్టుకున్నాడు. కన్వర్స్ షూ, బ్లాక్ టీ షర్ట్ ధరించాడు. ఆ టీషర్ట్పై అమెరికా జెండా, ఈగల్ గుర్తు ఉన్నాయి. ప్రజలు ఇస్తున్న సమాచారంతో నిందితుడు ఆనవాళ్లు మరిన్ని తెలుస్తున్నాయని ఉటా పోలీసు శాఖ పేర్కొన్నది. ఇప్పటి వరకు ఏడు వేల టిప్స్ అందినట్లు చెబుతున్నారు. అయితే ఆన్లైన్లో తప్పుడు సమాచారం ఎక్కువగా వ్యాప్తి చెందుతోందని, దీని పట్ల జాగ్రత్తగా ఉండాలని ఉటా గవర్నర్ స్పెన్సర్ కాక్స్ తెలిపారు. కిర్క్ పార్దీవదేహాన్ని ఉటా నుంచి ఆరిజోనాకు తరలించారు. ఎయిర్పోర్టు వద్ద కిర్క్ శవపేటికను ఉపాధ్యక్షుడు జేడీ వాన్స్ మోసారు.
