భారతీయుల టాలెంట్కు జర్మనీ స్వాగతం పలుకుతోంది. జర్మన్ అంబాసిడర్ డాక్టర్ ఫిలిప్ అకెర్మన్ ఈ విషయాన్ని స్వయంగా ప్రకటించారు. భారతీయులారా! మీరు హై స్కిల్ వర్కర్స్ అయితే, జర్మనీకి స్వాగతం. మాకు మీరు కావాలి అంటూ సోషల్ మీడియా వేదికగా ఓ వీడియో పోస్ట్ చేసి ప్రకటించారు. అంబాసిడర్ అకెర్మన్ ప్రకారం ఐటీ, మేనేజ్మెంట్, సైన్స్, టెక్నాలజీ వంటి విభాగాల్లో భారతీయులకు వేలాది ఉద్యోగ అవకాశాలు ఉన్నాయి. అంతేకాదు జర్మనీలో పనిచేస్తున్న సగటు భారతీయుడు స్థానికుల కంటే ఎక్కువ సంపాదిస్తున్నాడు. నిపుణుల అంచనా ప్రకారం జర్మనీలో వృద్ధాప్య జనాభాను సమతుల్యం చేయడానికి 2040 వరకు సంవత్సరానికి దాదాపు 2,88,000 ఇమ్మిగ్రెంట్లు అవసరం. ఈ డిమాండ్ను తీర్చడానికి, బెర్లిన్ ప్రొఫెషనల్ వీసా కేటాయింపులను విస్తరించింది. 2024లో భారతీయ కార్మికులకు అత్యధిక వాటా ఇచ్చి 10% కంటే ఎక్కువ పర్మిట్లు జారీ చేయాలని ప్లాన్ చేస్తోంది. గత సంవత్సరం జర్మన్ ప్రభుత్వం 2025లో 2,00,000 ప్రొఫెషనల్ వీసాలు జారీ చేస్తామని హామీ ఇచ్చింది. ప్రస్తుతం, జర్మనీలో దాదాపు 1,30,000 భారతీయ ప్రొఫెషనల్స్ పని చేస్తున్నారు. 2023 చివరి నాటికి, జర్మన్ పూర్తి సమయ కార్మికుల మధ్యస్థ జీతం నెలకు 3,945 యూరోలు. కానీ భారతీయ మూలాలున్న వారు సగటున 5,359 యూరోలు సంపాదిస్తున్నారని నివేదికలు చెబుతున్నాయి.
