త్రిపురలోని గోమతి జిల్లాలో 16 ఏళ్ల బాలికపై కదులుతున్న కారులో ఇద్దరు యువకులు అత్యాచారానికి పాల్పడిన ఘటన దేశవ్యాప్తంగా సంచలనం సృష్టించింది. ఈ కేసులో పోలీసులు అత్యాచారానికి పాల్పడిన ఇద్దరు నిందితులను అరెస్ట్ చేశారు. బాధితురాలి బంధువు కూడా ఈ నేరంలో ఉన్నాడని పోలీసులు వెల్లడించారు. పోలీసులు నిందితులుగా గుర్తించిన మిథున్ దేబ్నాథ్ (24), బోవర్ దేబ్బర్మ (24) అదే జిల్లాలోని మహారాణి ప్రాంతానికి చెందినవారు. బాధితురాలు వారి బంధువులతో కలిసి గురువారం సాయంత్రం గోమతి జిల్లాలోని ఉదయ్పూర్లో ఉన్న త్రిపుర సుందరి ఆలయానికి వెళ్లింది. ఆలయంలో దర్శనం చేసుకున్న తర్వాత ముగ్గురు కారులో ఉదయ్పూర్ రైల్వే స్టేషన్కు బయలుదేరారు. బాధితురాలి వాంగ్మూలం ప్రకారం రైల్వే స్టేషన్కు వెళ్లే మార్గంలో మిథున్, బోవర్ కదులుతున్న కారులో ఆమెపై అత్యాచారం చేశారు. బాధితురాలి ఫిర్యాదుతో పోలీసులు మొదట ముగ్గురిని అదుపులోకి తీసుకున్నారు. ఆమె వారిలో ఇద్దరిని మాత్రమే నిందితులుగా పేర్కొంది. బాధితురాలి కుటుంబం ఫిర్యాదు మేరకు పోలీసులు కేసు నమోదు చేసి ఇద్దరు నిందితులను అరెస్ట్ చేశారు. వారిలో మిథున్ దేబ్నాథ్ బాధితురాలి బంధువు. పోలీసులు నిందితులు ప్రయాణించిన కారును ఫోరెన్సిక్ పరీక్ష కోసం స్వాధీనం చేసుకున్నారు. అలాగే బాలిక వాంగ్మూలాన్ని మెజిస్ట్రేట్ ముందు నమోదు చేశారు. పోలీసులు ఈ కేసును వేగంగా, సమగ్రంగా దర్యాప్తు చేస్తామని తెలిపారు.
