మహారాష్ట్రలోని ముంబైకి చెందిన ఒక వ్యక్తికి, ఛత్తీస్గఢ్లోని రాయ్పూర్కు చెందిన ఒక మహిళకు కొన్ని సంవత్సరాల క్రితం వివాహం జరిగింది. అభిప్రాయ భేదాల కారణంగా ఇద్దరూ విడివిడిగా జీవించడం మొదలు పెట్టారు. విడాకుల కోసం దాఖలు చేసిన కేసులో భార్య తన భర్త గురించి "నపుంసకుడు" అని పేర్కొంది. కోర్టు ఇద్దరికీ విడాకులు మంజూరు చేయగా, ఆ ఆరోపణను ఆధారంగా చేసుకుని, మాజీ భర్త భార్యపై పరువు నష్టం కేసు పెట్టాడు. ఈ కేసును విచారించిన ముంబై సెషన్స్ కోర్టు, భర్త ఫిర్యాదును మెజిస్ట్రేట్ కోర్టు విచారించాలని ఆదేశించింది. దీనికి వ్యతిరేకంగా భార్య ముంబై హైకోర్టులో అప్పీల్ చేసింది. ఈ కేసు న్యాయమూర్తి ఎస్.ఎం. మోదక్ బెంచ్ ముందు విచారణకు వచ్చింది. విడాకుల కేసులో ఒక మహిళ తన వైవాహిక జీవితంలో ఎదురైన బాధను బయటపెట్టేటప్పుడు, నపుంసకత్వం గురించి ఆరోపణలు చేయడం పరువు నష్టం కిందకు రాదని న్యాయమూర్తి వివరించారు. "వివాహ సంబంధంలో తలెత్తే సమస్యలలో మహిళలు తమ ప్రయోజనాల కోసం కొన్ని నిజాలు చెప్పాల్సి వస్తుంది. అది పరువు నష్టం కాదు. ముఖ్యంగా విడాకుల కేసులలో ఇలాంటి ఆరోపణలు సర్వసాధారణంగా ఉంటాయి. అందువల్ల, దీనిని కేంద్రంగా చేసుకుని పరువు నష్టం కేసు పెట్టలేరు" అని న్యాయమూర్తి అన్నారు. దీంతో మాజీ భర్త దాఖలు చేసిన పిటిషన్ కొట్టివేయబడింది.
