తిరుపతిలో ముంతాజ్ హోటల్ నిర్మాణానికి గత ప్రభుత్వం మంజూరు చేసిన భూములను వెనక్కి తీసుకోవాలని స్వామీజీలు, హిందూ ధార్మిక సంస్థల ప్రతినిధులు డిమాండ్ చేస్తున్న సంగతి తెలిసిందే. తిరుమల పవిత్రతను కాపాడాలని, హోటల్‌కు కేటాయించిన స్థలాన్ని వెంటనే వెనక్కి తీసుకోవాలని డిమాండ్ చేస్తున్నారు. హైకోర్టులో పిటిషన్ సైతం దాఖలు చేశారు. ఈ వివాదానికి సీఎం చంద్రబాబు నాయుడు ఫుల్ స్టాప్ పెట్టారు. ముంతాజ్ హోటల్ నిర్మాణాన్ని రద్దు చేస్తున్నట్లు ప్రకటించారు. నారా దేవాన్ష్ పుట్టినరోజు సందర్భంగా సీఎం చంద్రబాబు కుటుంబం ప్రస్తుతం తిరుమలలో ఉన్న సంగతి తెలిసిందే. అన్నప్రసాద కేంద్రంలో మనవడి పేరిట అన్న వితరణ చేసిన అనంతరం చంద్రబాబు స్థానిక పద్మావతి అతిథి గృహంలో కీలక సమీక్ష చేపట్టారు. తిరుమల అభివృద్ధిపై టీటీడీ చైర్మన్ బీఆర్ నాయుడు, ఈవో శ్యామలరావు, ఇతరు అధికారులతో చంద్రబాబు సమీక్ష నిర్వహించారు. ఈ సందర్భంగా సీఎం చంద్రబాబు నాయుడు మాట్లాడుతూ ముంతాజ్ హోటల్, దేవలోక స్థల కేటాయింపు రద్దు చేస్తున్నట్లు ప్రకటించారు. ఆ హోటల్‌కు కేటాయించిన 20 ఎకరాలు భూ కేటాయింపులను కూడా రద్దు చేస్తున్నట్లు ప్రకటించారు. అలాగే మరో 35.32 ఎకరాల్లో వివిధ సంస్థలకు భూ కేటాయింపులను కూడా రద్దు చేస్తున్నట్లు సీఎం చంద్రబాబు నాయుడు ప్రకటించారు. ఏడు కొండలను ఆనుకుని వాణిజ్యపరమైన అంశాలకు అనుమతించేది లేదని సీఎం చంద్రబాబు నాయుడు స్పష్టం చేశారు. వ్యక్తిగత ప్రయోజనాలకు చోటులేదని హెచ్చరించారు. వెంకటేశ్వరస్వామి ఆస్తులన్నీ కాపాడడం తమ ముఖ్య లక్ష్యం అని సీఎం చంద్రబాబు నాయుడు పేర్కొన్నారు. వైసీపీ ఐదేళ్ల పాలనలో తిరుమల తిరుపతి దేవస్థానంలో అనేక దారుణాలు జరిగాయని చంద్రబాబు ఆరోపించారు. తిరుమల నుంచే ప్రక్షాళన చేస్తానని ఎన్నికల వేళ చెప్పానని, అధికారంలోకి వచ్చాక ఆ మేరకు చర్యలు తీసుకుంటున్నట్లు శుక్రవారం సీఎం చంద్రబాబు నాయుడు తెలియజేశారు. పవిత్ర పుణ్యక్షేత్రం తిరుమలకు నిత్యం వేల సంఖ్యలో భక్తులు తరలివస్తుంటారని, అన్నదానానికి చాలామంది విరాళాలు ఇస్తున్నారని సీఎం చంద్రబాబు నాయుడు చెప్పుకొచ్చారు. భక్తులకు అన్నప్రసాదాలు స్వయంగా వడ్డిస్తే కలిగే తృప్తి వెలకట్టలేనిది అని అన్నారు. ప్రతి ఒక్కరూ సమాజ హితం కోసం పనిచేయాలని సూచించారు. ఏడు కొండలు వెంకటేశ్వరస్వామి సొంతం అని అలాంటి ఆ ఏడు కొండల్లో ఎలాంటి అపవిత్ర కార్యక్రమాలు జరగరాదని సీఎం చంద్రబాబు నాయుడు హెచ్చరించారు. తిరుమల ఆలయంలో హిందువులు మాత్రమే పనిచేయాలని స్పష్టం చేశారు. టీటీడీలో అన్యమత ఉద్యోగులను తొలగించడానికి ఆదేశాలు ఇచ్చామని వెల్లడించారు. దేశవ్యాప్తంగా అన్ని రాష్ట్రాల రాజధానుల్లో వెంకటేశ్వరస్వామి ఆలయాలు నిర్మించాలని నిర్ణయం తీసుకున్నట్టు వివరించారు. ఆయా రాష్ట్రాల సీఎంలు కూడా ముందుకొస్తే త్వరితగతిన ఆలయ నిర్మాణాలు చేపడతామని చెప్పారు. మరోవైపు ప్రపంచవ్యాప్తంగా హిందువులు ఎక్కువగా ఉన్న చోట ఆలయాలు నిర్మిస్తామని.. శ్రీవారి ఆలయాల నిర్మాణం కోసం ప్రత్యేకంగా ఆలయ ట్రస్ట్ ఏర్పాటు చేయబోతున్నట్లు చంద్రబాబు తెలిపారు. ఇక అన్నదానం, ప్రాణదానం తరహాలోనే మాధవ సేవ పేరుతో కొత్త కార్యక్రమం చేపడుతున్నామని సీఎం చంద్రబాబు నాయుడు వెల్లడించారు.
