అమెరికా ఫెడరల్ బ్యూరో ఆఫ్ ఇన్వెస్టిగేషన్ (ఎఫ్ బీఐ)కు భారతీయ అమెరికన్ లీడర్ కాష్ పటేల్ ను సెనేట్ ఎన్నుకుంది. ఈ నేపథ్యంలో కాశ్‌ పటేల్ కీలక వ్యాఖ్యలు చేశారు. అమెరికన్లకు హాని చేయాలని చూస్తే సహించబోమని అన్నారు. ఈమేరకు ఆయన ఎక్స్ వేదికగా ఓ పోస్ట్‌ చేశారు. తనపై నమ్మకం ఉంచి కీలక బాధ్యతలు అప్పగించిన అధ్యక్షుడు డొనాల్డ్‌ ట్రంప్‌ , అటార్నీ జనరల్ పామ్‌ బోండికి ధన్యవాదాలు తెలిపారు. ఎఫ్ బీ ఐకి ఎంతో ఘన చరిత్ర ఉన్నదని, దేశ ప్రజలకు పారదర్శకంగా, జవాబుదారీగా ఉండేందుకు బ్యూరో కట్టుబడి ఉందని చెప్పారు. దేశం గర్వించే విధంగా ఎఫ్‌బీఐని పునర్నిర్మిస్తామని ఆయన స్పష్టం చేశారు.
