9 వందే భారత్ రైళ్లను ప్రధాని నరేంద్ర మోడీ ఆదివారం జెండా ఊపి ప్రారంభించారు. ఈ వందే భారత్ రైళ్ల ద్వారా ఈ అన్ని రాష్ట్రాల్లో ప్రయాణ సమయం తగ్గడమే కాకుండా కనెక్టివిటీ కూడా పెరుగుతుంది. ఈ సందర్భంగా మోడీ మాట్లాడుతూ రైల్వే బడ్జెట్లో మా ప్రభుత్వం అనూహ్యంగా పెంచిందని అన్నారు. 2014తో పోల్చితే ఈ ఏడాది రైల్వే బడ్జెట్ ఎనిమిది రెట్లు ఎక్కువ. కొత్త రైళ్లు, కొత్త రూట్లు, కొత్త స్టేషన్లలో నిరంతరంగా పనులు జరుగుతున్నాయి. దేశంలో చాలా పాత స్టేషన్లు ఇప్పటికీ ఉన్నాయని తెలిపారు. అందువల్ల అభివృద్ధి చెందుతున్న భారతదేశం ఇప్పుడు ఈ స్టేషన్లను కూడా అభివృద్ధి చేయాల్సిన అవసరం ఉందన్నారు. దేశంలో రవాణా ఖర్చులను తగ్గించేందుకు కొత్త లాజిస్టిక్స్ విధానాన్ని రూపొందించామని ప్రధాని మోదీ తెలిపారు. ఈ విధానాలన్నీ భారతీయుల సమయాన్ని ఆదా చేయడమే అన్నారు. ఈ వందేభారత్ రైళ్లన్నీ ఈ స్ఫూర్తితో తీసుకురాబడ్డాయన్నారు. వందేభారత్ రైళ్లు ఇప్పటికే దేశవ్యాప్తంగా పలు మార్గాల్లో నడుస్తున్నాయి. నేడు ప్రారంభించిన ఈ రైళ్లతో రెండు తెలుగు రాష్ట్రాల్లో నాలుగు వందే భారత్ రైళ్లు ప్రారంభించినట్లైంది. ఉదయపూర్ - జైపూర్, తిరునెల్వేలి-మధురై-చెన్నై, హైదరాబాద్ - బెంగళూరు, విజయవాడ - చెన్నై (రేణిగుంట మీదుగా), పాట్నా - హౌరా, కాసరగాడ్ - తిరువనంతపురం, రూర్కెలా - భువనేశ్వర్ - పూరి, రాంచీ - హౌరా, జామ్నగర్-అహ్మదాబాద్ మధ్య 9 కొత్త వందే భారత్ రైళ్లను ప్రధాని నరేంద్ర మోదీ వీడియో కాన్ఫరెన్స్ ద్వారా జెండా ఊపి ప్రారంభించారు. కవాచ్ టెక్నాలజీ వంటి అధునాతన భద్రతతోపాటు ప్రపంచస్థాయి సౌకర్యాలు కొత్త వందే భారత్ రైళ్లలో ఉంటాయని రైల్వే పేర్కొంది. రాజస్థాన్, తమిళనాడు, తెలంగాణ, ఆంధ్రప్రదేశ్, కర్ణాటక, బీహార్, పశ్చిమ బెంగాల్, కేరళ, ఒడిశా, జార్ఖండ్, గుజరాత్ రాష్ట్రాల్లో ఇవి అందుబాటులోకి వచ్చాయి.
