అమెరికాలో నవంబర్ 1 నుంచి దిగుమతి చేసుకునే అన్ని మధ్యస్థ, భారీ ట్రక్కులపై 25 శాతం సుంకాలను అమలు చేయనున్నారు. విదేశీ ఉత్పత్తుల నుంచి అమెరికన్ ట్రక్ తయారీదారులను రక్షించడానికే ఈ చర్య తీసుకున్నామని ట్రంప్ చెబుతున్నారు. దీనికి సంబంధించి ట్రంప్ తన ట్రూత్ సోషల్ మీడియాలో పోస్ట్ చేశారు. ఇతర దేశాల నుండి దిగుమతి చేసుకునే అన్ని మీడియం, హెవీ డ్యూటీ ట్రక్కులపై 25% సుంకం విధించబడుతుంది. అన్యాయమైన విదేశీ పోటీ నుంచి అమెరికన్ కంపెనీలు, కార్మకులను రక్షించడానికే ఈనిర్ణయం తీసుకున్నామని చెబుతూ పోస్ట్ పెట్టారు. విదేశీ డంపింగ్, అన్యాయమైన వాణిజ్య విధానాల వల్ల మా పరిశ్రమలు దెబ్బతినడానికి మేము అనుమతించమని అన్నారు. తాజాగా ట్రంప్ విధించిన సుంకాలకు మెక్సికో, కెనడా, జపాన్, జర్మనీ దేశాలు అత్యంత ఎక్కువగా ప్రభావితం కానున్నాయి. అన్నింటి కంటే ఎక్కువగా మెక్సికో యూఎస్ కు హెవీ ట్రక్కులను ఎగుమతి చేస్తుంది. 2019 నుండిమెక్సికన్ ట్రక్కుల ఎగుమతులు మూడు రెట్లు పెరిగి దాదాపు 340,000 యూనిట్లకు చేరుకున్నాయి. యునైటెడ్ స్టేట్స్, మెక్సికో మరియు కెనడా మధ్య USMCA ఒప్పందం ప్రకారం, ట్రక్కుల విలువలో 64% ఉత్తర అమెరికా నుండి వస్తే వాటిని ప్రస్తుతం సుంకం లేకుండా దిగుమతి చేసుకోవచ్చు. కానీ ప్రస్తుతం విధించిన టారీఫ్ ల వలన ఇది ప్రభావితం కానుంది. నిజానికి ఈ సుంకాలను ట్రంప్ గల నెల అక్టోబర్ 1 నుంచే అమలు చేస్తామని చెప్పారు. కానీ తరువాత వాటిని వాయిదా వేశారు.
