ఢిల్లీలోని రైల్వే స్టేషన్ తొక్కిసలాటలో 18 మంది ప్రాణాలు కోల్పోయిన ఘటనలో అసలు కారణం వెలుగులోకి వచ్చింది. గత ఫిబ్రవరిలో జరిగిన ఈ విషాద ఘటనకు ప్యాసింజర్ తలపై మోస్తున్న పెద్ద బ్యాగ్ కిందపడటమే ప్రధాన కారణమని రైల్వే మంత్రి అశ్విని వైష్ణవ్ పార్లమెంటులో వెల్లడించారు. సమాజ్వాదీ పార్టీ ఎంపీ రామ్ జీ లాల్ సుమన్ అడిగిన ప్రశ్నకు లిఖితపూర్వకంగా సమాధానం ఇస్తూ, ఈ ఘటనపై నియమించిన ఉన్నత స్థాయి విచారణ కమిటీ నివేదికలోని వివరాలను ఆయన పంచుకున్నారు. మహా కుంభమేళా కారణంగా ప్రయాణికుల రద్దీ ఎక్కువగా ఉన్న సమయంలో, ఫిబ్రవరి 15న రాత్రి 8:48 గంటలకు ఫుట్ ఓవర్ బ్రిడ్జి-3పై ఈ దుర్ఘటన చోటు చేసుకుంది. ఈ ఫుట్ ఓవర్ బ్రిడ్జి ప్లాట్ఫారమ్ నంబర్ 14, 15లను కలుపుతుంది. విచారణ కమిటీ నివేదిక ప్రకారం, రాత్రి 8:15 గంటల తర్వాత ఫుట్ ఓవర్ బ్రిడ్జిపై ప్రయాణికుల రద్దీ క్రమంగా పెరిగింది. చాలా మంది ప్రయాణికులు తమ తలలపై భారీ లగేజీని మోసుకుంటూ వెళ్తున్నారు. ఈ క్రమంలో, ఒక ప్రయాణికుడు తలపై మోస్తున్న ఒక పెద్ద బ్యాగ్ జారి కిందపడింది. దీంతో పై మెట్లపై ఉన్న ప్రయాణికులు కింది మెట్లపై ఉన్న వారిని నెట్టుకున్నారు. ఇది డొమినో ప్రభావంలా పనిచేసి, మెట్లపై ఉన్న ప్రయాణికులు ఒకరిపై ఒకరు పడిపోయారు. ఈ తొక్కిసలాటలో 18 మంది చనిపోగా, 15 మంది గాయపడ్డారు. ఈ ఘటనపై తీవ్ర దిగ్భ్రాంతి వ్యక్తం చేసిన మంత్రి, మరణించిన వారి కుటుంబాలకు రూ. 10 లక్షలు, తీవ్రంగా గాయపడిన వారికి రూ. 2.5 లక్షలు, స్వల్ప గాయాలైన వారికి రూ. 1 లక్ష చొప్పున పరిహారం చెల్లించినట్లు తెలిపారు. భవిష్యత్తులో ఇలాంటి సంఘటనలు పునరావృతం కాకుండా ఉండేందుకు రైల్వే శాఖ అనేక చర్యలు చేపట్టిందని ఆయన తెలిపారు.
