రష్యాలో అధ్యక్షుడు వ్లాదిమిర్ పుతిన్ తన కేబినెట్ నుంచి తొలగించిన కొద్ది గంటలకే రవాణా శాఖ మాజీ మంత్రి రోమన్ స్టారోవాయిట్ ఆత్మహత్య చేసుకోవడం తీవ్ర సంచలనం సృష్టిస్తోంది. ఈ ఘటనతో రష్యా రాజకీయ వర్గాలు ఉలిక్కిపడ్డాయి.మాస్కో శివారు ప్రాంతంలోని తన కారులో రోమన్ స్టారోవాయిట్ తుపాకీతో కాల్చుకుని ప్రాణాలు తీసుకున్నారని రష్యా వార్తా సంస్థలు వెల్లడించాయి. ఆయన మృతదేహాన్ని కారులో కనుగొన్నట్లు దేశ ఇన్వెస్టిగేటివ్ కమిటీ సైతం ధ్రువీకరించింది. సోమవారం ఆయనను మంత్రి పదవి నుంచి తొలగిస్తున్నట్లు అధికారిక ప్రకటన వెలువడిన వెంటనే ఈ విషాదం జరిగింది.కేవలం ఏడాదికి పైగా మంత్రిగా పనిచేసిన స్టారోవాయిట్ను పదవి నుంచి ఎందుకు తొలగించారనే దానిపై ప్రభుత్వం ఎలాంటి కారణం వెల్లడించలేదు. అయితే, జూలై 5, 6 తేదీలలో ఉక్రెయిన్ డ్రోన్ దాడుల భద్రతా ముప్పు కారణంగా రష్యాలోని ప్రధాన విమానాశ్రయాల్లో దాదాపు 300 విమాన సర్వీసులు రద్దయ్యాయి. ఈ వైఫల్యం కారణంగానే ఆయనపై వేటు పడి ఉండవచ్చని విశ్లేషణలు వెలువడుతున్నాయి.గతంలో ఉక్రెయిన్ సరిహద్దులోని కుర్స్క్ ప్రాంతానికి దాదాపు ఐదేళ్ల పాటు గవర్నర్గా స్టారోవాయిట్ పనిచేశారు. మే 2024లో రవాణా మంత్రిగా బాధ్యతలు చేపట్టారు. ఆయన స్థానంలో నోవ్గోరోడ్ ప్రాంత మాజీ గవర్నర్ ఆండ్రీ నికిటిన్ను కొత్త రవాణా మంత్రిగా నియమిస్తూ క్రెమ్లిన్ ఉత్తర్వులు జారీ చేసింది.
