అసోంలోని తిన్సుకియా జిల్లాలోని షుకాని గ్రామానికి చెందిన ఊర్వశి మోరన్, ప్రాంజల్ మోరన్ భార్య,భర్తలు. జనవరి 12న లిడులోని మైనింగ్ మాఫియా చేపట్టిన బొగ్గు తవ్వకాలలో ప్రాంజల్ పనిచేస్తు గల్లంతయ్యాడు. అతడి జాడ కోసం కుటుంబ సభ్యులు, బంధువులు తీవ్రంగా గాలించారు. అయినా ఫలితం లేకపోయింది. దీంతో మార్చి 4న కుటుంబ సభ్యులు లిడు పోలీసులను ఆశ్రయించారు. కానీ మాఫియా గ్యాంగ్ ఒత్తిడితో వాళ్ల ఫిర్యాదును పోలీసులు స్వీకరించలేదు. మైనింగ్ మాఫియా గ్యాంగ్ ఊర్వశికి సైతం రూ.5 లక్షలు ఇవ్వజూపింది. కానీ ఊర్వశి ఆ డబ్బును తీసుకోలేదు. తనకు తన భర్త కావాలని డిమాండ్ చేసింది. స్థానిక పోలీసులు ఎంతకీ స్పందించకపోవడం వల్ల.. 650 కిలోమీటర్ల దూరమున్న గుహవటికి వెళ్లాలని నిర్ణయించుకుంది ఊర్వశి. వెంటనే తన బిడ్డను చంకనెత్తుకుని గుహవటికి చేరుకుంది. రాష్ట్ర డీఐజీ జీపీ సింగ్ను తన కార్యాలయంలో కలిసింది. ఘటన మొత్తాన్ని ఆయనకు వివరించింది. ఎలాగైన తన భర్తను వెతకాలని ప్రాధేయపడింది. దీనిపై స్పందించిన డీఐజీ ఊర్వశి భర్త ప్రాంజల్ను వెతికిపెడతామని ఆమెకు హామీ ఇచ్చారు. దక్షిణ అసోం ఇన్ఛార్జ్ ఐజీపీ జిత్మల్ డేల్కు దర్యాప్తు బాధ్యతను అప్పగించారు. ప్రాంజల్ తప్పిపోయిన బొగ్గుగని ప్రాంతానికి.. సోమవారం తన టీంతో వెళ్లాడు ఐజీపీ జిత్మల్ డేల్. వెంటనే గాలింపు చర్యలు చేపట్టారు. శుక్రవారం బొగ్గు గనుల కింద కుళ్లిపోయిన స్థితిలో ప్రాంజల్ మృతదేహాన్ని గుర్తించారు. భర్త చనిపోయిన విషయాన్ని తెలుసుకున్న ప్రాంజల్ భార్య, అతడి కుటుంబ సభ్యులు కన్నీరుమున్నీరయ్యారు. ప్రస్తుతం ఈ ఘటన మొత్తం రాష్ట్రవ్యాప్తంగా చర్చనీయాంశంగా మారింది. ఘటనలో ఇద్దరిని అదుపులోకి తీసుకున్నామని పోలీసులు తెలిపారు.
