ఢిల్లీలో జరిగిన మున్సిపల్ కార్పొరేషన్ఎన్నికల్లో గెలిచిన ఇద్దరు కాంగ్రెస్ కౌన్సిలర్లతో పాటు ఆ పార్టీకి చెందిన ఓ నాయకుడు ఆమ్ ఆద్మీ పార్టీలో చేరారు. ఆ తర్వాత కొన్ని గంటల వ్యవధిలోనే మళ్లీ సొంత గూటికి వచ్చారు. ముస్తఫాబాద్ వార్డు నుంచి గెలిచిన సబీలా బేగం, బ్రిజ్పురి వార్డునుంచి గెలిచిన నజియా ఖాటూన్, అలాగే, ముస్తఫాబాద్ ప్రాంతానికి చెందిన కాంగ్రెస్ పార్టీ నేత అలీ మెహదీ ఆమ్ ఆద్మీ పార్టీలో చేరారు. అయితే, వీరి చేరికను వ్యతిరేకిస్తూ ముస్తఫాబాద్ లో కొందరు ఆందోళనకు దిగారు. అలీ మెహదీ దిష్టిబొమ్మను దహనం చేశారు. దీంతో, కొన్ని గంటల తర్వాత మోహదీతో పాటు ఆ ఇద్దరు కౌన్సిలర్లు మళ్లీ కాంగ్రెస్ పార్టీలోకి వచ్చారు. అనంతరం మెహదీ సోషల్ మీడియాలో ఒక వీడియోను పోస్ట్ చేశాడు. తాను కాంగ్రెస్కు, రాహుల్ గాంధీకి లాయల్ వర్కర్నని పేర్కొన్నాడు. తాను ఆప్లోకి వెళ్లి తప్పు చేశానని, తమ ప్రాంతంలో అభివృద్ధి పనులు జరుగుతాయనే ఆశతో తాను ఆప్లో చేరానని, కానీ ఇది మూర్ఖపు చర్య అని పేర్కొన్నారు. మైనారిటీ సమస్యలపై ఆప్ నేతల వైఖరి కూడా మారలేదన్నారు. "నేను చాలా పెద్ద తప్పు చేశాను. నా తప్పును అంగీకరిస్తున్నాను. నేను రాహుల్ను, కాంగ్రెస్ను విడిచిపెట్టను. రాహుల్ను చేతులు జోడించి క్షమాపణ కోరుతున్నాను" అని మెహదీ వీడియోలో పేర్కొన్నాడు.
