చైనాలోని యున్నన్ అకాడమీ ఆఫ్ అగ్రికల్చరల్ సైన్సెస్కు చెందిన పరిశోధకులు కొత్త రకం వరి వంగడాన్ని అభివృద్ధి చేశారు. దీనికి 'పెరెన్నియల్ రైస్ - PR23' అని పేరు పెట్టారు. సాధారణంగా వరిని ఒక్కసారి నాటితే ఒకే సీజన్లో కోత తీసుకోవచ్చు. కానీ ఈ కొత్త రకం వరిని ఒకసారి నాటితే వరుసగా ఆరు సీజన్ల వరకు (సుమారు మూడు సంవత్సరాల పాటు) నిరంతరంగా పంట అందిస్తుంది. మళ్లీ మళ్లీ నాటాల్సిన అవసరం లేకుండా, మొక్కలు తానే పునరుద్ధరించుకొని మళ్లీ పంట ఇచ్చే సామర్థ్యం కలిగి ఉంటాయి. ఇది ప్రపంచవ్యాప్తంగా రైతులకు విప్లవాత్మక మార్పును తెచ్చే అవకాశం ఉంది. ఈ వంగడాన్ని అభివృద్ధి చేయడానికి శాస్త్రవేత్తలు సుమారు రెండు దశాబ్దాలపాటు పరిశోధనలు చేశారు. సాధారణ వరి రకాలను ఊపిరి తట్టుకునే అడవి రకాలతో కలిపి ఈ హైబ్రిడ్ వంగడాన్ని రూపొందించారు. దీని ప్రత్యేకత ఏమిటంటే ప్రతి కోత తర్వాత మొక్కలు రూట్స్టాక్ ద్వారా తిరిగి పెరుగుతాయి. దీంతో రైతులు మళ్లీ నేలను దున్నాల్సిన అవసరం ఉండదు, నారు ఖర్చు తగ్గుతుంది, నేలలోని పోషకాలు కూడా సంరక్షించబడతాయి. పంట ఉత్పత్తి స్థిరంగా ఉండటంతో పాటు పర్యావరణానికి కూడా ఇది మేలు చేస్తుందని శాస్త్రవేత్తలు చెబుతున్నారు. దీని ద్వారా కార్బన్ ఉద్గారాలు తగ్గి, నీటి వినియోగం కూడా గణనీయంగా తగ్గుతుందని నివేదికలు సూచిస్తున్నాయి. ప్రస్తుతం ఈ 'పెరెన్నియల్ రైస్ PR23' ను 17 దేశాల్లో ప్రయోగాత్మకంగా సాగు చేస్తున్నారు. అందులో భారత్లోని తమిళనాడు, ఒడిశా రాష్ట్రాలు కూడా ఉన్నాయి. మొదటి రెండు సీజన్లలోనే మంచి దిగుబడి రావడంతో రైతులు ఉత్సాహం వ్యక్తం చేస్తున్నారు. దీని వలన నారు ఖర్చు 60% వరకు, శ్రమ 50% వరకు తగ్గుతుందని అంచనా. అంతర్జాతీయ స్థాయిలో ఈ పంట పేద, అభివృద్ధి చెందుతున్న దేశాల రైతులకు పెద్ద సహాయకారిగా నిలుస్తుందని నిపుణులు అభిప్రాయపడుతున్నారు.
