అంతర్జాతీయ ఒలింపిక్ కమిటీ (ఐఓసీ) తొలి మహిళా అధ్యక్షురాలిగా కిర్సీ కోవెంట్రీ ఎన్నికయ్యారు. ఆమె తొలిసారిగా ఐఓసీకి నాయకత్వం వహిస్తున్న ఆఫ్రికన్ మహిళగా కూడా రికార్డు సృష్టించారు. 97 మంది ఐఓసీ సభ్యులు పాల్గొన్న ఓటింగ్‌లో కోవెంట్రీ తొలి రౌండ్‌లోనే విజయానికి అవసరమైన 49 ఓట్లు సాధించి ఘన విజయం సాధించారు. ఆమె నియామకం ఒలింపిక్ దినోత్సవమైన జూన్ 23 నుంచి అధికారికంగా ప్రారంభం కానుంది. ఎనిమిదేళ్ల పాటు ఈ పదవిలో కొనసాగనున్న కోవెంట్రీ, ఐఓసీకి కొత్త మార్గదర్శకత్వాన్ని అందించనున్నారు. జింబాబ్వేకి చెందిన కోవెంట్రీ, ఒలింపిక్ ఈత పోటీల్లో ప్రపంచ రికార్డులు నెలకొల్పిన దిగ్గజ క్రీడాకారిణిగా పేరు తెచ్చుకున్నారు. క్రీడల్లో ఆమె చూపిన నిబద్ధతను ఐఓసీకి కూడా తీసుకురావడం ద్వారా, స్పోర్ట్స్ పరిపాలనలో సమానత్వం, పారదర్శకత, కొత్త మార్గాలు తెరచే అవకాశాలు కనిపిస్తున్నాయి.
