అమెరికన్ ఎలక్ట్రిక్ కార్ కంపెనీ టెస్లా భారతదేశంలో తన మొదటి షోరూమ్ కోసం స్థలాన్ని చూసింది. ముంబైలోని బాంద్రా కుర్లా కాంప్లెక్స్ లోని గ్రౌండ్ ఫ్లోర్‌లో టెస్లా తన మొదటి షోరూమ్‌ను ప్రారంభించడానికి కంపెనీ దాదాపు 4,000 చదరపు అడుగుల స్థలాన్ని అద్దెకు తీసుకుంది. దీనికి సంబంధించిన ఒక ఒప్పందాన్ని ఖరారు చేసింది. ప్రాపర్టీ మార్కెట్ వర్గాలను ఉటంకిస్తూ ఈ అంశాన్ని ఇండియా టుడే నివేదిక పేర్కొంది. దీని నెలవారీ అద్దె చదరపు అడుగుకు రూ. 900 అని చెబుతున్నారు. అంటే నెలకు దాదాపు రూ. 35 లక్షలు. టెస్లా ఈ స్థలాన్ని ఐదు సంవత్సరాలకు గానూ అద్దెకు తీసుకుంది. ఇక్కడ కంపెనీ తన విస్తృత శ్రేణి కార్లను ప్రదర్శిస్తుంది. అన్నీ సరిగ్గా జరిగితే.. కంపెనీ ఏప్రిల్ నుంచి కార్ల అమ్మకాలను ప్రారంభించవచ్చు. ముంబైతో పాటు, దేశ రాజధాని ఢిల్లీలో కూడా టెస్లా షోరూమ్‌ను ప్రారంభించాలని యోచిస్తోంది. దీనికోసం ఆ కంపెనీ ఢిల్లీలోని ఏరోసిటీలో షోరూమ్ కోసం స్థలం కోసం వెతుకుతోంది.
