'స్పేస్ఎక్స్' నిర్మించి ప్రయోగించిన బాహుబలి రాకెట్ నింగిలోకి విజయవంతంగా దూసుకెళ్లి, ప్రయోగించిన ఎనిమిది నిమిషాల్లోనే రాకెట్ సిగ్నల్స్ కోల్పోవడం వల్ల లోపల జంట పేలుళ్లు సంభవించాయని స్పేస్ఎక్స్ ప్రకటించింది. దీంతో రెండోసారి కూడా స్టార్షిప్ ప్రయోగం విఫలమైనట్లయింది. స్థానిక కాలమానం ప్రకారం శనివారం ఉదయం దక్షిణ టెక్సాస్ తీరం నుంచి ఈ ప్రయోగాన్ని చేపట్టారు. 400 అడుగుల ఎత్తులో నిర్మించిన ఈ 'స్టార్షిప్-2' రాకెట్ ప్రపంచంలోనే అతిపెద్ద శక్తివంతమైన లాంఛ్ వెహికిల్. "బూస్టర్ స్టార్షిప్ను విజయవంతంగా నింగిలోకి పంపించాం. అయితే కొద్ది నిమిషాల్లోనే రాకెట్ ఇంజిన్లలో మంటలు చెలరేగాయి. కమ్యూనికేషన్ వ్యవస్థ దెబ్బతింది. దీంతో అప్పటివరకు సాఫీగా దూసుకుపోతున్న రాకెట్ ఒక్కసారిగా కూలిపోయింది." అని స్పెస్ఎక్స్ సైంటిస్టులు తెలిపారు.
