దేశీయ మార్కెట్లో ఇటలీకి చెందిన ద్విచక్ర వాహన తయారీ సంస్థ ఏప్రిలియా తాజాగా ప్రీమియం శ్రేణిలో కొత్త స్కూటర్ను విడుదల చేసింది. ఎస్ ఆర్ 175 పేరిట లాంచ్ చేసిన ఈ స్కూటర్కి ప్రారంభ ధర రూ.1.26 లక్షలు (ఎక్స్-షోరూమ్) గా నిర్ణయించారు. ఇది గత మోడల్ అయిన ఎస్ ఆర్ 160కి అప్గ్రేడ్ వర్షన్గా తీసుకువచ్చారు. కొత్త ఎస్ ఆర్ 175 మోడల్లో 174.7cc సింగిల్ సిలిండర్ ఎయిర్ కూల్డ్ ఇంజిన్ అమర్చారు. ఈ ఇంజిన్ త్రీ వాల్వ్ సెటప్ తో పనిచేస్తూ, 7200 RPM వద్ద 12.92 హెచ్పీ శక్తిను ఉత్పత్తి చేస్తుంది. గత SR 160 మోడల్లో ఇది కేవలం 11.27 హెచ్పీ మాత్రమే ఉండేది. అలాగే, టార్క్ విషయంలోనూ గణనీయమైన మెరుగుదల కనిపిస్తుంది - ఇది ఇప్పుడు 14.14Nmగా ఉండగా, గతంలో 13.44Nm మాత్రమే ఉండేది. ఈ స్కూటర్ను ఆధునిక టెక్నాలజీతో తీర్చిదిద్దారు. ఇందులో కలర్ TFT డిస్ప్లే, బ్లూటూత్ కనెక్టివిటీ, కాల్ నోటిఫికేషన్లు, అలర్ట్లు, మ్యూజిక్ కంట్రోల్ వంటి స్మార్ట్ఫీచర్లు ఉన్నాయి. వినియోగదారుడు తన స్మార్ట్ఫోన్ను స్కూటర్కు కనెక్ట్ చేసుకునే సౌలభ్యం ఉంటుంది. డిజైన్ పరంగా ఎస్ ఆర్ 175 మోడల్, ఎస్ ఆర్ 160 మాదిరిగానే ఉన్నప్పటికీ, ఇందులో కొత్త పెయింట్ స్కీమ్ మరియు మిడ్-వెయిట్ స్పోర్ట్ బైక్ ఎస్ ఆర్ 457 ను పోలిన లుక్ ను అందించారు. ఇది రెడ్-వైట్, పర్పుల్-రెడ్ కాంబినేషన్లలో లభిస్తుంది. స్కూటర్ ముందు మరియు వెనుక భాగాల్లో 14 అంగుళాల టైర్లు అమర్చారు, వీటి వెడల్పు 120 సెక్షన్ గా ఉంది. బ్రేకింగ్ వ్యవస్థలో ఫ్రంట్లో డిస్క్ బ్రేక్, వెనుక డ్రమ్ బ్రేక్, అలాగే సింగిల్ ఛానెల్ ABS ఉంటుంది. ప్రీమియం, స్పోర్టీ లుక్ తో ఎస్ ఆర్ 175, మార్కెట్లో ఇప్పటికే ఉన్న హీరో జూమ్ 160 మరియు యమహా ఏరోక్స్ 155 వంటి మోడళ్లకు గట్టి పోటీ ఇవ్వనుంది. శక్తివంతమైన ఇంజిన్, ఆధునిక ఫీచర్లు, స్టైలిష్ డిజైన్ వంటి అంశాలతో ఏప్రిలియా ఎస్ ఆర్ 175 స్కూటర్ ప్రీమియం సెగ్మెంట్లో వినియోగదారులను ఆకట్టుకోవడం ఖాయం.
