కొన్నేళ్ల క్రితం రాష్ట్రీయ జనతాదళ్ (ఆర్జేడీ) నేత లాలూ ప్రసాద్ యాదవ్ ఓ టీవీ ఛానెల్ కి ఇచ్చిన ఇంటర్వ్యూలో భారత్, ఇండియాకు మధ్య వ్యత్యాసాన్ని వివరించిన వీడియో ఇప్పుడు సోషల్ మీడియాలో వైరల్ గా మారింది. వేప పుల్లలో పళ్లు తోముకుంటూ లాలూ ప్రసాద్ యాదవ్ ఈ రెండింటి మధ్య వ్యత్యాసాన్ని వివరించారు. ఢిల్లీలో వేప పుల్లలు దొరుకుతాయా ? అని ఇంటర్వ్యూ యాంకర్ ప్రశ్నించినప్పుడు ఢిల్లీ ఇండియా కిందకు వస్తుందని, పాట్నా భారత్ కిందకు వస్తుందని, పళ్లు తోముకునేందుకు వేపపుల్లలు భారత్ లో సులువుగా దొరుకుతాయని ఆయన చెప్పడం ఈ వీడియోలో చెప్పడం విశేషం. ఈనెల 18-22 మధ్య జరిగే ప్రత్యేక పార్లమెంట్ సమావేశాల్లో ఇండియా పేరు భారత్ గా మారుస్తూ బిల్లు పెట్టవచ్చనే ఊహాగానాలు వెలువడుతున్నాయి. అయితే కేంద్రం నుంచి ఎలాంటి ప్రకటనైతే రాలేదు. కానీ ఈ పేరు మార్పుపై ప్రతిపక్షాలు తీవ్రంగా విమర్శలు గుప్పిస్తున్నాయి. విపక్షాలన్నీ కలిసి ఇండియా కూటమి అని పేరు పెట్టుకోవడం వల్లే బీజేపీ భయపడి దేశం పేరు భారత్ గా మార్చాలని చూస్తోందని విమర్శలు గుప్పిస్తున్నాయి.
