కేరళలో మూడో తరగతి చదువుతున్న విద్యార్థిని ఆదిత్యశ్రీ ఏప్రిల్ 25 న ఫోన్ పేలి మృతి చెందిన విషయం విదితమే. కాగా పేలిన మొబైల్ రెడ్మీనే అని పలు నివేదికలు వెల్లడించాయి. బ్యాటరీ ఓవర్ హీట్ కావడమే పేలుడుకు కారణమని అధికారులు తెలిపారు. కాగా ఈ విషాద ఘటనపై రెడ్మీ మాతృసంస్థ షావోమీ స్పందించింది. ఘటనకు కారణాలను తెలుసుకోవడానికి అధికారులతో కలిసి తాము పని చేస్తామని షావోమీ ఒక ప్రకటనలో తెలిపింది. కస్టమర్ల భద్రత తమకు చాలా ముఖ్యమని, అలాంటి విషయాలను సీరియస్గా తీసుకుంటామని కంపెనీ స్పష్టం చేసింది. వారి కుటుంబానికి అండగా నిలుస్తామని వెల్లడించింది. దర్యాప్తు చేసే అధికారులకు సహకరిస్తామని కంపెనీ యాజమాన్యం పేర్కొంది.
